ກວຕ ຢ້ຽມຢາມ ແລະ ຊຸກຍູ້ວຽກງານຢູ່ ແຂວງສາລະວັນ

ໃນຕອນເຊົ້າຂອງວັນທີ 26 ຕຸລາ 2016 ຜ່ານມານີ້, ພະແນກວິທະຍາສາດ ແລະ ເຕັກໂນໂລຊີ ແຂວງສາລະວັນ ໄດ້ເປັນກຽດຕ້ອນຮັບ ທ່ານ ບັນດິດ ສຈ. ບໍ່ວຽງຄຳ ວົງດາລາ, ກຳມະການສູນກາງພັກ, ລັດຖະມົນຕີກະຊວງວິທະຍາສາດ ແລະ ເຕັກໂນໂລຊີ ພ້ອມດ້ວຍຄະນະ ໄດ້ເຄື່ອນໄຫວຢ້ຽມຢາມ ແລະ ຊຸກຍູ້ວຽກງານ ຢູ່ ພະແນກວິທະຍາສາດ ແລະ ເຕັກໂນໂລຊີ ແຂວງ ສາລະວັນ.ເນື່ອງໃນໂອກາດດັ່ງກ່າວ ທ່ານ ສີສຸດອນ ອັງຄະໄຣ, ຫົວໜ້າພະແນກ ວິທະຍາສາດ ແລະ ເຕັກໂນໂລຊີ ແຂວງ ສາລະວັນ ພ້ອມດ້ວຍອ້າຍນ້ອງພະ ນັກງານພາຍໃນພະແນກ ແລະ ຫ້ອງການວິທະຍາສາດ ແລະ ເຕັກໂນໂລຊີ ເມືອງສາລະວັນ ໄດ້ໃຫ້ກຽດຕ້ອນຮັບ ພ້ອມທັງລາຍງານສະພາບການ ເຄື່ອນໄຫວວຽກງານໃນໄລຍະຜ່ານມາ ແລະ ທິດທາງແຜນການໃນຕໍ່ໜ້າ ໃຫ້ແກ່ຄະນະຮັບຊາບ ເປັນຕົ້ນແມ່ນການເຄື່ອນໄຫວວຽກງານ ສາມສ້າງ ຄຽງຄູ່ກັບວຽກງານວິຊາສະເພາະ ໃນນັ້ນແມ່ນ ໄດ້ລົງເຄື່ອນໄຫວຊຸກຍູ້, ຕິດຕາມ ແລະ ແນະນໍາແບບແຜນວິທີເຮັດວຽກ ໃຫ້ ແກ່ເມືອງສາມສ້າງ 3 ເມືອງ ເປັນຕົ້ນແມ່ນວຽກງານ ເຕັກໂນໂລຊີຂໍ້ ມູນຂ່າວສານ (IT), ວຽກງານຊັບສິນທາງປັນຍາ, ມາດຕະຖານ ແລະ ວັດແທກ. ພ້ອມດຽວກັນ ໄດ້ເຄື່ອນໄຫວລົງກວດສອບ ແລະ ສະກັດກັ້ນການລະເມີດຜະລິດຕະພັນຈໍາໜ່າຍສິນຄ້າປ້ອມແປງ ລອກຮຽນແບບ, ອອກໃບຢັ້ງຢືນຄຸນນະພາບຜະ ລິດຕະພັນຕ່າງໆຈໍານວນໜຶ່ງ, ລົງກວດສອບ, ຄຸ້ມຄອງ ແລະ ຂຶ້ນທະບຽນບັນດາພາຫະນະເຄື່ອງວັດແທກຊິງຊັ່ງ, ຫົວຈ່າຍນໍ້າມັນເຊື້ອໄຟຕາມປໍ້າຕ່າງໆ, ປໍ້າອິ້ວດ້ວຍມື ແລະ ຊິງຊັ່ງທຸກປະເພດ, ກົງເຕີນໍ້າປະປາ, ກົງເຕີໄຟຟ້າ ແລະ ອືນໆ ໃນຂອບເຂດແຂວງ ສາລະວັນ.
ພາຍຫຼັງຮັບຟັງການລາຍງານ ກອງປະຊຸມຍັງໄດ້ມີການປຶກສາຫາລືປະກອບຄໍາຄິດເຫັນຢ່າງກົງໄປກົງມາ ລະຫວ່າງ ບັນດາຫົວໜ້າຫ້ອງການ, ກົມ, ສະຖາບັນ ພາຍໃນກະຊວງ ແລະ ພະແນກວິທະຍາສາດ ແລະ ເຕັກໂນໂລຊີ ແຂວງສາລະວັນ ເພື່ອຄົ້ນຄວ້າແກ້ໄຂບັນຫາຂໍ້ຄົງຄ້າງ ແລະ ແຜນຈັດຕັ້ງປະຕິບັດວຽກງານໃນຕໍ່ໜ້າ.