ພວຕ ແຂວງສາລະວັນ ຈັດກອງປະຊຸມດໍາເນີນຊີວິດ ປະຈໍາປີ 2016

ໃນຄັ້ງວັນທີ 24-25 ມັງກອນ 2017 ໜ່ວຍພັກ ພະແນກວິທະຍາສາດ ແລະ ເຕັກໂນໂລຊີ ແຂວງສາລະວັນ ໄດ້ຈັດກອງປະຊຸມດໍາເນີນຊີວິດການເມືອງປະຈໍາປີ 2016. ໂດຍພາຍໃຕ້ການເປັນປະທານຂອງທ່ານ ສີສຸດອນ ອັງຄະໄລ ເລຂາໜ່ວຍພັກ ຫົວໜ້າພະແນນວິທະຍາສາດ ແລະ ເຕັກໂນໂລຊີ ແຂວງສາລະວັນ, ມີຜູ້ເຂົ້າຮ່ວມທັງໝົດ 19 ສະຫາຍ, ຍິງ 06 ສະຫາຍ.

ຕະຫຼອດໄລຍະເວລາ ສອງວັນ ຜ່ານມາຂອງການດຳເນີນຊີວິດການເມືອງໃນໜ່ວຍພັກ ພະແນກວິທະຍາສາດ ແລະເຕັກໂນໂລຊີ ໂດຍພື້ນຖານແລ້ວ ແມ່ນສະແດງໃຫ້ເຫັນບັນຫາທີ່ພົ້ນເດັ່ນ, ດ້ານຕັ້ງໜ້າ ໃນຫຼາຍໆດ້ານໂດຍສະເພາະກອງປະຊຸມໄດ້ຕີລາຄາຈັດປະເພດຄະນະພັກ, ປະເພດສາມາຊິກພັກ, ປະເພດຂອງພະນັກງານລັດຖະກອນ ແລະ ບັນ ດາກໍລະນີຕ່າງໆນັບທັງກໍລະນີລວມ ແລະ ກໍລະນີບຸກຄົນທີ່ໄດ້ສະແດງອອກໃນບົດສຳຫຼວດຕົນເອງ ແລະ ບົດສະຫຼຸບຜົນສຳເລັດບັ້ນດຳເນີນຊີວິດການເມືອງຄັ້ງນີ້ຢ່າງລະອຽດຈະແຈ້ງ, ຜົນສຳເລັດບັ້ນດຳເນີນຊີວິດການເມືອງເທື່ອນີ້ມັນໄດ້ຢັ້ງຢືນໃຫ້ເຫັນເຖິງຄວາມສາມັກຄີເປັນເອກະພາບ, ຍົກສູງຄວາມຮັບຜິດຊອບຕໍ່ໜ້າທີ່ການເມືອງ ຂອງບັນດາສະຫາຍສະມາຊິກພັກ, ພະນັກງານລັດຖະກອນ. ໃຫ້ມີລະດັບຄວາມຮູ້-ຄວາມສາມາດ, ດ້ານວິຊາສະເພາະດ້ານຕ່າງໆທີ່ແນ່ນອນ, ມີຄຸນສົມບັດສິນທຳປະຕິວັດ, ມີຄວາມບໍລິສຸດອັນໂປ່ງໃສ, ມີຄວາມສາມັກຄີອັນໜຶ່ງອັນດຽວ ແລະ ມີຄວາມເອກະພາບສູງຕໍ່ທັດສະນະຂອງພັກ ແລະ ມີຫົວຄິດປະດິດສ້າງທີ່ດີ, ມີຄວາມຮັບຜິດຊອບສູງຕໍ່ໜ້າທີ່ການເມືອງຂອງພັກ, ບໍ່ແບ່ງພັກແຍກພວກ, ຈຸ້ມເຈື້ອເຊື້ອສາຍອັນພາໃຫ້ບົດບາດອິດທິພົນຂອງພັກເຊື່ອມເສຍ. ນອກ ຈາກນັ້ນ ກອງປະຊຸມ ຍັງໄດ້ເອກະພາບຍຶດໜັ້ນ ແລະ ໄດ້ປະຕິບັດຕາມຫຼັກການຂອງພັກລະບຽບກົດໜາຍຂອງລັດ ເຮັດວຽກແບບລວມສູນປະຊາທິປະໄຕ, ຕົກລົງເປັນໝູ່ຄະນະ, ບຸກຄົນຮັບຜິດຊອບ ມີຄວາມສູ້ຊົນ ແລະ ປະຕິບັດຕາມຄາດໜາຍທີ່ວາງໃວ້ , ໄດ້ຈັດຕັ້ງສະຫຼຸບ, ຖອດຖອນບົດຮຽນ ພາຍໃນໝູ່ຄະນະສະມາຊິກພັກ, ສ້າງຄວາມເປັນເອກະພາບ ແລະ ຕັດສິນໃຈ ດັດແປງແກ້ໄຂປັນຫາປະກົດການຫໍ້ຍທໍ້ ໃນຖັນແຖວສະມາຊິກພັກ, ພະນັກງານ-ລັດຖະກອນ.