ຜົນສໍາເລັດ ບັ້ນດໍາເນີນຊີວິດການເມືອງໜ່ວຍພັກ ພວຕ ແຂວງສາລະວັນ

ໃນລະຫວ່າງວັນທີ 09–12 ພະຈິກ 2015 ທີ່ຜ່ານມານີ້, ໜ່ວຍພັກຮາກຖານ ພະແນກວິທະຍາສາດ ແລະ ເຕັກໂນໂລຊີ ແຂວງສາລະວັນ ໄດ້ຈັດກອງປະຊຸມ ບັ້ນດໍາເນີນຊີວິດການເມືອງຂື້ນພາຍໃນໜ່ວຍພັກເຊີ່ງການເປັນປະທານຂອງທ່ານ ສີສຸດອນ ອັງຄະໄລ ເລຂາໜ່ວຍພັກ, ຫົວໜ້າພະແນກວິທະຍາສາດ ແລະ ເຕັກໂນໂລຊີ ແຂວງສາລະວັນ. ກອງປະຊຸມຄັ້ງນີ້ໂດຍໃຫ້ກຽດເຂົ້າຮ່ວມຂອງທ່ານ ຄໍາຈັນ ແຈ່ມສະໝອນ ຄະນະປະຈໍາພັກແຂວງ, ປະທານກວດກາ ພັກ-ລັດ ແຂວງສາລະວັນ

ກອງປະຊຸມບັ້ນຊີວິດການເມືອງໃນຄັ້ງນີ້ ໄດ້ມີສາມະຊິກພັກ ຕາງໜ້າຈາກຄະນະໂຄສະນາອົບຮົມແຂວງ, ພະນະກວດກາພັກ-ລັດແຂວງ, ຄະນະຈັດຕັ້ງ ແຂວງ, ພະນັກງານຫຼັກແຫຼ່ງ ແລະ ພະນັກງານ-ລັດຖະກອນ ພາຍໃນພະແນກວິທະຍາສາດ ແລະ ເຕັກໂນໂລຊີ ທັງໝົດ 25 ສະຫາຍ, ຍິງ 05 ສະຫາຍ.
ການດໍາເນີນຊີວິການເມືອງໜ່ວຍພັກ ຄັ້ງນີ້ ແມ່ນໄດ້ສໍາຫຼວດກວດກາຕີລາຄາຄືນຜົນງານດ້ານດີ ແລະ ຂໍ້ຄົງຄ້າງນັບທັງອັນລວມຂອງຄະນະພັກ, ສາມະຊິກ ພັກ, ບຸກຄົນແລະການຈັດຕັ້ງອື່ນໆ. ນອກຈາກນັ້ນ, ກອງປະຊຸມຍັງໄດ້ເຊື່ອມຊືມເອກະສານ 3 ບົດຈາກຄະນະໂຄສະນາອົບຮົມແຂວງ ເຊີ່ງມັນໄດ້ສະແດງໃຫ້ ເຫັນຄວາມໝາຍຄວາມສໍາຄັນໃນຫຼາຍດ້ານເຊັ່ນ:
– ເອກະສານບົດທີ 1: ຝຶກຝົນຫຼໍ່ຫຼອມຄຸນທາດການເມືອງ ແລະ ຄຸນສົມບັດສິນທໍາປະຕິວັດ.
– ເອກະສານບົດທີ 2: ປັບປຸງແບບແຜນວິທີເຮັດວຽກ ແລະ ຍົກສູງຄວາມສາມາດຂອງຄະນະພັກຂັ້ນຕ່າງໆ
– ເອກະສານບົດທີ 3: ເຊື່ອມຊືມໜັກແໜ້າມາດຖານຄະນະພັກ, ຂໍ້ຫ້າມສາມະຊິກພັກ ແລະ ຄວາມຮັບຜິດຊອບຂອງພະນັກ ງານ ນໍາພາ-ຄຸ້ມຄອງ.
– ຫຼັງຈາກນັ້ນ, ກອງປະຊຸມຍັງເຊື່ອມຊືມກົດໝາຍຕ້ານການສໍ້ລາດບັງຫຼວງ.

ກອງປະຊຸມໄດ້ເຊື່ອມຊືມເອກະສານບົດແນະນໍາຄະນະກວດກາແຂວງ ເລກທີ 107/ຄກຂ, ເຊີ່ງຕິດພັນກັບການແນະນໍາຂຽນບົດສໍາຫຼວດສາມະຊິກພັກ, ພະ ນັກງານລັດຖະກອນພາຍໃນ ພະແນກວິທະຍາສາດ ແລະ ເຕັກໂນໂລຊີ ແຂວງສາລະວັນ. ແລະ ກອງປະຊຸມຍັງໄດ້ຜ່ານຮ່າງ ບົດລາຍງານການເມືອງ ສະ ຫຼຸບຕີລາຄາຜົນງານການເຄື່ອນໄຫວ ຈຸດດີ-ຈຸດອ່ອນ ຂອງໜ່ວຍພັກສະໃໝທີ I ແລະ ວາງທິດທາງແຜນການໃນ 1 ປີຕໍ່ໜ້າ 2015-2016.
ນອກຈາກນັ້ນ, ກອງປະຊຸມຍັງໄດ້ຮັບຟັງການໂອ້ລົມຈາກທ່ານ ຄໍາຈັນ ແຈ່ມສະໝອນ ຄະນະປະຈໍາພັກແຂວງ ປະທານກວດກາ ພັກ-ລັດ ແຂວງສາລະວັນ. ເຊີ່ງທ່ານໄດ້ຍົກໃຫ້ເຫັນບັນຫາອັນພົ້ນເດັ່ນໃນຫຼາຍດ້ານ ໂດຍສົມທຽບໃສ່ກັບພາກພື້ນໃນໂລກ ແລະ ໃຫ້ທິດຊີ້ນໍາຢ່າງຈະແຈ້ງຊັດເຈນ ເຊີ່ງເປັນບົດຮຽນອັນ ປະເສີດ ແລະ ເປັນທວນໄຟແຫ່ງຄວາມສະຫວ່າງສ່ອງໃສ ເພື່ອນໍາໄປສູ່ການຈັດຕັ້ງປະຕິບັດໃຫ້ເກີດດອກອອກຜົນ ປະສົບຜົນສໍາເລັດຢ່າງມີປະສິດທິພາບ ແລະ ປະສິກທິຜົນສູງສຸດ.