ກໍາມະບານຮາກຖານພະແນກວິທະຍາສາດ ແລະ ເຕັກໂນໂລຊີແຂວງ ສາລະວັນ ປະກາດຮັບຮອງ 5 ເປັນເຈົ້າ 3 ປີ ຕໍ່ເນື່ອງ.

ໃນວັນທີ 30 ຕຸລາ 2019 ກໍາມະບານຮາກຖານພະແນກວິທະຍາສາດ ແລະ ເຕັກໂນໂລຊີ ແຂວງສາລະວັນ ໄດ້ຈັດກອງປະຊຸມສະຫຼຸບຕີລາຄາພ້ອມທັງຮັບຮອງ 5 ເປັນເຈົ້າ 3 ປີຕໍ່ເນື່ອງຂຶ້ນຢູ່ທີ່ຫ້ອງປະຊຸມຂອງພະແນກວິທະຍາສາດ ແລະ ເຕັກໂນໂລຊີແຂວງ ໂດຍເປັນປະທານຂອງທ່ານ ສົມມະນີ ໄຊຍະວົງ ປະທານຮາກຖານກໍາມະບານພະແນກວິທະຍາສາດ ແລະ ເຕັກໂນໂລຊີ ແຂວງສາລະວັນ. ເປັນກຽດເຂົ້າຮ່ວມຂອງທ່ານ ສຸລິດ ສິລິມະໂນທໍາປະທານສະຫະພັນກໍາມະບານແຂວງ ແລະ ທ່ານ ແຫວນເພັດ ລັດດາວົງ ກໍາມະການພັກແຂວງ ເລຂາໜ່ວຍພັກຫົວໜ້າພະແນກວິທະຍາສາດ ແລະ ເຕັກໂນໂລຊີ ແຂວງສາລະວັນ. ພ້ອມແຂກຖືກເຊີນຈາກພາກສ່ວນຕ່າງໆ ແລະ ອ້າຍເອື້ອຍນ້ອງສະມາຊິກກໍາມະບານພາຍໃນເຂົ້າຮ່ວມ, ທ່ານ ໝັກ ບຸນເຮືອງສີ ຮອງປະທານຮາກຖານກໍາມະບານພະແນກວິທະຍາສາດ ແລະ ເຕັກໂນໂລຊີແຂວງ ກໍ່ໄດ້ຂຶ້ນຜ່ານບົດສະຫຼຸບລາຍງານຕີລາຄາກ່ຽວກັບການຈັດຕັ້ງປະຕິບັດວຽກງານຂອງສະມາຊິກກໍາມະບານໃນໄລຍະ 3 ປີ, ພ້ອມທັງວາງທິດທາງຕໍ່ໜ້າ, ໃນໄລຍະຜ່ານມາແມ່ນໄດ້ເອົາໃຈໃສ່ໂຄສະນາສຶກສາອົບຮົມການເມືອງ-ແນວຄິດໃຫ້ແກ່ພະນັກງານລັດຖະກອນ, ສະມາຊິກກໍາມະບານ, ເປັນຕົ້ນແມ່ນການຈັດຕັ້ງເຊື່ອມຊືມເອກະສານມະຕິກອງປະຊຸມໃຫຍ່ຄັ້ງທີ X ຂອງພັກ, ຄັ້ງທີ VIII ຂອງອົງຄະນະພັກແຂວງ, ມະຕິ VII ຂອງສູນກາງກໍາມະບານລາວ ແລະ ມະຕິ VI ຂອງກໍາມະບານແຂວງ ແລະ ມະຕິກອງປະຊຸມໃຫຍ່ຄັ້ງທີ III ຂອງກໍາມະບານຮາກຖານພະແນກວິທະຍາສາດ ແລະ ເຕັກໂນໂລຊີແຂວງ. ນອກຈາກນັ້ນກໍ່ຍັງໄດ້ເຊື່ອມຊືມວັນສໍາຄັນຕ່າງໆຂອງພັກ ແລະ ຂອງຊາດ, ມະຕິຄໍາສັ່ງ, ກົດໝາຍ ແລະ ກົດລະບຽບອື່ນໆທີ່ພັກ-ລັດວາງອອກໃນແຕ່ລະໄລຍະ. ກໍາມະບານຮາກຖານພະແນກວິທະຍາສາດ ແລະ ເຕັກໂນໂລຊີແຂວງ ສາລະວັນ ມີສະມາຊິກທັງໝົດ 25ສະຫາຍ, ຍິງ 10 .ສະຫາຍ, ປະຈຸບັນມີ 19 ສະຫາຍ, ຍິງ10 ສະຫາຍ, ຜ່ານການຈັດຕັ້ງເນຶ້ອໃນຂໍ້ແຂ່ງຂັນ 5 ເປັນເຈົ້າ ໃນໄລຍະ 3 ປີຜ່ານມາ, ສາມາດຕີລາຄາດັ່ງນີ້ຄື: ເປັນເຈົ້າການໂຄສະນາສຶກສາອົບຮົມການເມືອງ-ແນວຄິດປະຕິບັດໄດ້ຂໍ້ລະ 89% ເປັນເຈົ້າການໃນການປັບປຸງແບບແຜນການນໍາພາປະຕິບັດໄດ້ ແລະ ຂະຫຍາຍການຈັດຕັ້ງກໍາມະບານ, ເປັນເຈົ້າການໃນການຕິດຕາມ, ກວດກາຄຸ້ມຄອງລັດ, ເສດຖະກິດ-ສັງຄົມ, ເປັນເຈົ້າການໃນການປົກປ້ອງສິດຜົນປະໂຫຍດອັນຊອບທໍາຂອງພະນັກງານສະມາຊິກກໍາມະບານ, ກໍາມະກອນ ແລະ ຊາວຜູ້ອອກແຮງງານປະຕິບັດໄດ້ຂໍ້ລະ 88% ແລະ ເປັນເຈົ້າການໃນການເຂົ້າຮ່ວມການປະຕິບັດແນວທາງການຕ່າງປະເທດ ແລະ ລະບຽບກົດໝາຍປະຕິບັດໄດ້ຂໍ້ລະ 87%, ຈາກໝາກຜົນ ແລະ ຜົນງານໃນການຈັດຕັ້ງປະຕິບັດຂໍ້ແຂ່ງຂັນ 5 ເປັນເຈົ້າ 3 ປີຜ່ານມາເຮັດໃຫ້ສະມາຊິກກໍາມະບານໄດ້ຮັບໃບຍ້ອງຍໍ 5 ເປັນເຈົ້າ 3 ປີຕໍ່ເນື່ອງ ມີທັງໝົດ 15ສະຫາຍ, ຍິງ 7 ສະຫາຍ, ເທົ່າກັບ 90%