ຮອງເຈົ້າແຂວງສາລະວັນ ພົບປະໂອ້ລົມ ແລະ ມອບເຄື່ອງຊ່ວຍເຫຼືອຜູ້ປະສົບໄພນ້ຳຖ້ວມ 2 ບ້ານ

ໃນວັນທີ 9 ກັນຍາ 2019 ນີ້, ທ່ານ ພູທົງ ຄຳມະນີວົງ ຮອງເຈົ້າແຂວງໆສາລະວັນ ປະທານຄະນະກຳມະການຄວບຄຸມໄພພິບັດຂັ້ນແຂວງ ໄດ້ລົງເຄື່ອນໄຫວພົບປະໂອ້ລົມພໍ່ແມ່ປະຊາຊົນ ຜູ້ປະສົບໄພນ້ຳຖ້ວມຢູ່ 2 ບ້ານຂອງເມືອງສາລະວັນ ຄື: ບ້ານກະຊະໃຫຍ່ ແລະ ບ້ານຫາດທອງຫຼວງ ພ້ອມທັງມອບເຄື່ອງຊ່ວຍເຫຼືອ, ໃນນັ້ນໄດ້ມອບໃຫ້ອົງການປົກຄອງບ້ານກະຊະໃຫຍ່ ມີປະເພດ: ເຂົ້າສານໜຽວ 5 ສອບ, ເຄື່ອງນຸ່ງຫົ່ມ 70 ສອບ, ປາປ໋ອງ ແລະ ນ້ຳດື່ມຈຳນວນໜຶ່ງ ແລະ ວັນດຽວກັນກໍ່ໄດ້ມອບໃຫ້ບ້ານຫາດທອງຫຼວງ ມີເຄື່ອງນຸ່ງຫົ່ມ 70 ສອບ, ໜີ່ 50 ແກັດ, ນ້ຳດື່ມ 40 ແຟັກ ແລະ ປາປ໋ອງຈຳນວນໜຶ່ງ, ຮັບໂດຍຕາງໜ້າອົງການປົກຄອງທັງ 2 ບ້ານ ພ້ອມດ້ວຍພາກສ່ວນທີ່ກ່ຽວຂ້ອງຂັ້ນແຂວງ, ຂັ້ນເມືອງ ແລະ ພໍ່ແມ່ປະຊາຊົນ ເຂົ້າຮ່ວມ.
ສຳລັບບ້ານກະຊະໃຫຍ່ ເນື້ອທີ່ທຳການຜະລິດ ຖືກນ້ຳຖ້ວມ ກວມເອົາ 70%ຂອງເນື້ອທັງໝົດ, ມີ 100 ກວ່າຄອບຄົວ ແລະ 100 ກວ່າຫຼັງຄາເຮືອນ ທີ່ໄດ້ຮັບຜົນກະທົບ, ສ່ວນບ້ານຫາດທອງຫຼວງ ເນື້ອທີ່ນາຖືກຖ້ວມ 15 ພັນເຮັກຕາ, ເຂົ້າເປືອກ 5 ພັນກວ່າກິໂລ, ພາຫະນະປະເພດລົດຈັກ 12 ຄັນ, ວັດຖຸສິ່ງຂອງ ແລະ ສັດລ້ຽງຕ່າງໆ, ຊື່ງມູນຄ່າຄວາມເສຍຫາຍ ຍັງບໍ່ທັນສາມາດເກັບກຳໄດ້ລະອຽດ.
ໃນໂອກາດດຽວກັນນັ້ນ, ທ່ານປະທານຄະນະກຳມະການຄວບຄຸມໄພພິບັດຂັ້ນແຂວງ ກໍ່ໄດ້ໃຫ້ກຽດໂອ້ລົມ ແລະ ຊີ້ແຈງ ໃຫ້ພໍ່ແມ່ປະຊາຊົນ ເຂົ້າໃຈຕໍ່ຜົນກະທົບທີ່ເກີດຈາກໄພທຳມະຊາດ, ຊື່ງໄດ້ສ້າງຄວາມເສຍຫາຍຕໍ່ຊັບສິນ, ວັດຖຸສິ່ງຂອງ ແລະ ສັດລ້ຽງ ຕະຫຼອດຮອດເນື້ອທີ່ທຳການຜະລິດ, ພ້ອມດຽວກັນນັ້ນທ່ານຍັງໄດ້ຮຽກຮ້ອງໃຫ້ອົງການປົກຄອງບ້ານ ເອົາໃຈໃສ່ຊ່ວຍເຫຼືອ, ເບີ່ງແຍງເຊີ່ງກັນ ແລະ ກັນ, ທັງນຳເອົາເຄື່ອງທີ່ໄດ້ຮັບໃນຄັ້ງນີ້ ໄປແຈກຢາຍໃຫ້ແກ່ຜູ້ປະສົບໄພ, ພ້ອມນັ້ນໄດ້ເນັ້ນໃຫ້ພໍ່ແມ່ປະຊາຊົນ ຈົ່ງມີຄວາມສະໝານສາມັກຄີ, ຊ່ວຍເຫຼືອເຊີ່ງກັນ ແລະ ກັນ ພ້ອມກັນຂ້າມຜ່ານຄວາມຫຍຸ້ງຍາກ ໄປດ້ວຍກັນ ແລະ ຕິດຕາມການແຈ້ງເຕືອນຕ່າງໆ ເພື່ອສະຕິ, ເຝົ້າລະວັງສະພາບການຕ່າງໆທີ່ອາດຈະເກີດຂຶ້ນ ແລະ ບັນຫາອື່ນໆ.
ຂ່າວ-ພາບ: ວິໄລວອນ ສິດທິໄຊ