ຮອງນາຍົກລັດຖະມົນຕີ ເນັ້ນໜັກໃຫ້ແຂວງສາລະວັນ ເລັ່ງສຸມໃສ່ແກ້ໄຂຊີວິດການເປັນຢູ່ປະຊາຊົນ ແລະ ຟື້ນຟູ ພາຍຫຼັງນ້ຳຖ້ວມ

ທ່ານ ປອ ສອນໄຊ ສີພັນດອນ ຮອງນາຍົກລັດຖະມົນຕີ ປະທານຄະນະກຳມະການປ້ອງກັນ ແລະ ຄວບຄຸມໄພພິບັດແຫ່ງຊາດ ພ້ອມດ້ວຍຄະນະ ໄດ້ລົງເຄື່ອນໄຫວຊີ້ນຳວຽກງານການແກ້ໄຂ ແລະ ຊ່ວຍເຫຼືອຜູ້ປະສົບໄພນໍ້າຖ້ວມຢູ່ແຂວງສາລະວັນ, ໃນວັນທີ 6 ກັນຍານີ້ ຢູ່ເດີ່ນບິນແຂວງສາລະວັນ, ໂດຍການຕ້ອນຮັບຂອງ ທ່ານ ສີສຸວັນ ວົງຈອມສີ ເຈົ້າແຂວງໆສາລະວັນ ພ້ອມຄະນະ, ຊື່ງໄດ້ຊີ້ນຳວຽກງານຫຼາຍດ້ານ ທີ່ຈຳເປັນ ແລະ ອັນເປັນສີ່ງຮີບດ່ວນ ເປັນຕົ້ນ: ການຊ່ວຍເຫຼືອ, ສົງເຄາະຜູ້ປະສົບໄພນ້ຳຖ້ວມ, ການລຳລຽງສະບຽງອາຫານ ໃຫ້ເຖີງພໍ່ແມ່ປະຊາຊົນ ແລະ ອື່ນໆ.
ຈາກນັ້ນ, ທ່ານກໍ່ໄດ້ຮັບຟັງການລາຍງານສະພາບການເກີດອຸທົກກະໄພຄັ້ງນີ້, ໃນທົ່ວແຂວງສາລະວັນ ແລະ ການຊ່ວຍເຫຼືອ, ກອບກູ້ເອົາຊີວິດສັບຊິນຂອງພໍ່ແມ່ປະຊາຊົນ ໃນແຕ່ລະບ້ານ, ແຕ່ລະເມືອງ ພ້ອມທັງການສົງເຄາະ, ຊ່ວຍເຫຼືອຜູ້ປະສົບໄພທີ່ຖືກອົບພະຍົບ ມາຢູ່ສູນພັກເຊົາຊົ່ວຄາວຕ່າງໆ. ຊື່ງກ່ອນອື່ນ, ທ່ານຮອງນາຍົກລັດຖະມົນຕີ ໄດ້ເຄື່ອນໄຫວຢື້ຢາມຖາມຂ່າວປະຊາຊົນຜູ້ປະສົບໄພນ້ຳຖ້ວມ ຢູ່ເມືອງຄົງເຊໂດນ ທີ່ສູນພັກເຊົາສຸກເສີນ ຫ້ອງວ່າການປົກຄອງເມືອງ ແລະ ໃຫ້ກຳລັງໃຈ ໂດຍແນໃສ່ເຮັດໃຫ້ຜູ້ປະສົບໄພພິບັດມີຂວັນ, ມີກຳລັງໃຈ ແລະ ມີແຮງຕໍ່ສູ້ ພ້ອມກັນຜ່ານຜ່າວິກິດນີ້ໄປໄດ້ດ້ວຍດີ, ພ້ອມທັງໄດ້ມອບເງິນສົດ 50 ລ້ານກີບ ແລະ ເຄື່ອງອຸປະໂພກ-ບໍລິໂພກຈຳນວນໜຶ່ງ. ຈາກນັ້ນທ່ານ ກໍ່ໄດ້ລົງເຄື່ອນໄຫວຢູ່ ເມືອງວາປີ ເພື່ອຕິດຕາມເບີ່ງສະພາບການແກ້ໄຂ, ການໃຫ້ຄວາມຊ່ວຍເຫຼືອປະຊາຊົນ ທີ່ຖືກອົບພະຍົບ ໃນເຫຼືອເບື້ອງຕົ້ນ, ພ້ອມດຽກັນນັ້ນ ກໍ່ໄດ້ມອບເງິນສົດ 50 ລ້ານກີບ ແລະ ເຄື່ອງອຸປະໂພກ-ບໍລິໂພກ.
ໂອກາດດຽວກັນນັ້້ນ, ທ່ານ ປອ ສອນໄຊ ສີພັນດອນ ໄດ້ຊີ້ນຳວຽກງານຫຼາຍດ້ານ ແລະ ເນັ້ນໜັກໃຫ້ເອົາໃຈໃສ່ຫຼາຍບັນຫາທີ່ສຳຄັນ ໂດຍສະເພາະແມ່ນເລັ່ງສຸມໃສ່ແກ້ໄຂບັນຫາຕ່າງໆຢ່າງຮີບດ່ວນ ໃນທຸກໆເຂດທີ່ປະສົບໄພນ້ຳຖ້ວມ, ທັງໄດ້ແນະນຳສືບຕໍ່ໃຫ້ການຊ່ວຍເຫຼືອ ແລະ ຕິດຕາມສະພາບອາກາດຢ່າງເປັນປົກກະຕິຕໍ່ເນື່ອງ, ສືບຕໍ່ກອບກູ້ເອົາຊີວິດຂອງພໍ່ແມ່ປະຊາຊົນ ທີ່ຄົງຄ້າງໃນບ້ານ ທີ່ຢູ່ໃນເຂດທີ່ສູງ, ແກ້ໄຂສ້າງສະຖານທີ່ພັກເຊົາຊົ່ວຄາວ ກັບທີ່, ຕ້ອງລຳບຽງສະບຽງອາຫານຕ່າງໆ ສົ່ງໃຫ້ປະຊາຊົນ ແລະ ອຸປະກອນທີ່ຈຳເປັນ ເຊັ່ນ: ພ້າ, ສຽມ, ຈົກ ແລະ ອື່ນໆ, ຕ້ອງໄດ້ແຕ່ງຕັ້ງຄະນະຮັບຜິດຊອບສູນອົບພະຍົບຊົ່ວຄາວໃນແຕ່ລະເມືອງ, ແຕ່ລະຈຸດ ເພື່ອຕິດຕາມເບີ່ງສະພາບການຊ່ວຍເຫຼືອ, ການສະໜອງເຂົ້າປາອາຫານ ແລະ ການເບີກຈ່າຍເຄື່ອງຂອງຕ່າງໆ ຕ້ອງໄດ້ຂຶ້ນບັນຊີເກັບກຳຂໍ້ມູນຢ່າງລະອຽດ ເພື່ອໃຫ້ທົ່ວເຖີງທຸກຄອບຄົວ, ສີ່ງສຳຄັນ ເມື່ອປະຊາຊົນ ໄດ້ເຂົ້າມ້ຽນເຮືອນຂອງຕົນ ແລະສາມາດຢູ່ໄດ້ ຈື່ງເບີກຈ່າຍວັດຖຸສີ່ງຂອງໃຫ້, ຕິດຕາມສະພາບຢູ່ສູນພັກເຊົາເປັນປົກກະຕິ ແລະ ເອົາໃຈໃສ່ດ້ານຄວາມສະອາດ, ມີການບໍລິການກວດສຸຂະພາບ ແລະ ໃຫ້ກຳລັງໃຈໃນດ້ານແນວຄິດຕໍ່ກັບຜູ້ປະສົບໄພນ້ຳຖ້ວມ. ພາຍຫຼັງນ້ຳເລີ່ມບົກແຫ້ງລົງ ຕ້ອງຕະລຸມບອນອະນາໄມ, ເຮືອນຊານ, ສຳນັກງານຕ່າງໆ, ທັງຄອບຄົວເປັນເຈົ້າການເອງ ແລະ ຈັດສັນກຳລັງຊາວໜຸ່ມ, ແມ່ຍິງ, ກຳມະບານ ແລະ ກຳລັງທະຫານເຂົ້າຊ່ວຍເຫຼຶອເຊີ່ງກັນ ແລະກັນ. ທັງໄດ້ຢໍ້າຕື່ມ ກ່ຽວກັບການລໍາລຽງເຄື່ອງຂອງຕ່າງໆ ເຊັ່ນ: ເຄື່ອງອຸປະໂພກ-ບໍລິໂພກ, ສິ່ງຂອງທີ່ຈຳເປັນໃຫ້ເຖີງປະຊາຊົນໂດຍໄວ. ພ້ອມດຽວກັນນັ້ນ ທ່ານກໍ່ໄດ້ມອບເງິນຊ່ວຍເຫຼືອແກ້ໄຂໄພພິບັດໃນເບື້ອງຕົ້ນໃຫ້ອົງການປົກຄອງແຂວງ 100 ລ້ານກີບ ແລະ ຢາປົວພະຍາດອີກຈຳນວນໜື່ງ. ພາບ ແລະ ຂ່າວ ໂດຍ: ວິໄລວອນ ສິດທິໄຊ