ພະແນກວິທະຍາສາດ ແລະ ເຕັກໂນໂລຊີ ແຂວງສາລະວັນ ໄດ້ເປີດຝືກອົບຮົມ ການນໍາໃຊ້ ແລະ ການຄຸ້ມຄອງເວັບໄຊ 5 ຕົວເມືອງ ແລະ ພະແນກການອ້ອມຂ້າງແຂວງສາລະວັນ ທີ່ ພະແນກວິທະຍາສາດ ແລະ ເຕັກໂນໂລຊີ ແຂວງສາລະວັນ. ໃນລະຫວ່າງວັນທີ 05-06 ກັນຍາ 2018 ດ້ວຍການເປັນປະທານຂອງທ່ານ ແຫວນເພັດ ລັດດາວົງ ກໍາມະການພັກແຂວງ, ຫົວໜ້າພະແນກວິທະຍາສາດ ແລະ ເຕັກໂນໂລຊີ ແຂວງສາລະວັນ
ການຝຶກອົບຮົມໃນຄັ້ງນີ້ມີ 7 ພາກສ່ວນເຂົ້າຮ່ວມ: ຫ້ອງວ່າການປົກຄອງແຂວງສາລະວັນ, ພະແນກການເງິນແຂວງສາລະວັນ, ເມືອງສາລະວັນ, ເມືອງເລົ່າງາມ, ເມືອງວາປີ, ເມືອງຄົງເຊໂດນ ແລະ ເມືອງລະຄອນເພັງ. ເຊີ່ງມີນັກສໍາມະນາກອນເຂົ້າຮ່ວມທັງໜົດ 21 ທ່ານ, ຍິງ 05 ທ່ານ. ສໍາລັບນັກວິທະຍາກອນ ແມ່ນວິຊາການຂອງ ພະແນກວິທະຍາສາດ ແລະ ເຕັກໂນໂລຊີ ແຂວງສາລະວັນ ທີ່ຮັບຜິດຊອບເປັນຄູຝືກ.
ຈຸດປະສົງຫຼັກ ໃນການຝຶກອົບຮົມໃນຄັ້ງນີ້ ກໍ່ເພື່ອເປັນການເສີມຂະຫຍາຍ ແລະ ອໍານວຍຄວາມສະດວກໃນການຈັດຕັ້ງປະຕິບັດວຽກງານເຕັກໂນໂລຊີ ຂໍ້ມູນຂ່າວສານ ໂດຍສະເພາະແມ່ນ ພະນັກງານເຕັກນິກການຄຸ້ມຄອງ ແລະ ນໍາໃຊ້ເວັບໄຊ ທີ່ທາງພະແນກໄດ້ສ້າງຂື້ນ ແນ່ໃສ່ເຮັດໃຫ້ພະນັກງານຄຸ້ມຄອງທາງດ້ານເຕັກນິກ ສາມາດຄຸ້ມຄອງລະບົບຄວາມປອດໄພ, ການຂຽນຂ່າວ ແລະ ນໍາເອົາຂ່າວສານການເຄື່ອນໄຫວຕ່າງໆຂື້ນສູ່ເວັບໄຊເມືອງຂອງຕົນ ໃຫ້ເກີດມີປະສິດທິພາບ ແລະ ປະສິດທິຜົນຫຼາຍຂື້ນ. ການຝຶກອົບຮົມໄດ້ດໍາເນີນເປັນເວລາ 2 ວັນ, ເຊີ່ງໄດ້ເນັ້ນໜັກບາງຫົວຂໍ້ທີ່ສໍາຄັນດັ່ງນີ້:

1) ການຕິດຕັ້ງລະບົບຄວບຄຸມ Wamp server 3.0.6
2) ການຕິດຕັ້ງ Project Website WordPress CMS 4.9 ພາຍໃນເຄື່ອງຄອມພິວເຕີ
3) ການຕັ້ງຄ່າລະບົບການເຮັດວຽກໃຫ້ກັບ Website WordPress CMS 4.9
4) ການ upload ແລະ ການບໍລິຫານ-ຈັດການກ່ຽວກັບຮູບພາບ, Article & Categories
5) ການກະກຽມ ແລະ ການຕົກແຕ່ງຮູບພາບ ເພື່ອລົງຂ່າວ
6) ເຕັກນິກໃນການຂຽນ ແລະ ການລົງຂ່າວໃຫ້ກັບ website ທີ່ຢູ່ໃນຮູບແບບຂໍ້ຄວາມ ແລະ ຮູບພາບ
7) ການຄຸ້ມຄອງກ່ຽວກັບ Menu, Widget & Theme
8) ເຕັກນິກໃນການນໍາໃຊ້ ແລະ ກໍານົດສິດທິໃຫ້ກັບ User ເພື່ອຄວາມປອດໄພຂອງ Website

ຜ່ານການຝຶກອົບຮົມ ການຄຸ້ມຄອງ ແລະ ການນໍາໃຊ້ເວັບໄຊ ດ້ວຍລະບົບ WordPress CMS 4.9 ແມ່ນສັງເກດເຫັນໄດ້ວ່າ ນັກສຳມະນາກອນແຕ່ລະທ່ານໄດ້ມີຄວາມກະຕືລືລົ້ນ ແລະ ຫ້າວຫັນ, ມີຄວາມຕັ້ງໃຈ, ເອົາໃຈໃສ່ສູງ ແລະ ຕັດສິນໃຈຢ່າງເດັດຂາດ ໃນການແລກປ່ຽນ, ເກັບກໍາບົດຮຽນໄດ້ເປັນຢ່າງດີ.
ພາຍຫຼັງສໍາເລັດການຝຶກອົບຮົມ ກໍ່ໄດ້ມອບໃບຢັ້ງຢືນການຝືກອົບຮົມ ການນໍາໃຊ້ ແລະ ການຄຸ້ມຄອງເວັບໄຊ ດ້ວຍ WordPress ໃຫ້ແກ່ນັກສໍາມະນາກອນທັງໝົດ 21 ທ່ານ, ເພື່ອເປັນບ່ອນອີງໜື່ງທີ່ສະແດງເຖິງໝາກຜົນສໍາເລັດ ໃນການຈັດຕັ້ງປະຕິບັດໃນຄັ້ງນີ້. ກອງປະຊຸມໄດ້ປິດລົງໃນເວລາ 15:00 ໂມງ ໃນວັນທີ 6 ກັນຍາ 2018