ໃນຕອນເຊົ້າຂອງວັນທີ 24 ກໍລະກົດ 2018, ທີ່ຫ້ອງປະຊຸມຂອງພັກ ພະແນກວິທະຍາສາດ ແລະເຕັກໂນໂລຊີແຂວງສາລະວັນ,  ໜ່ວຍສະຫະພັນແມ່ຍິງພະແນກວິທະຍາສາດ ແລະເຕັກໂນໂລຊີແຂວງສາລະວັນ ໄດ້ເປີດກອງປະຊຸມໃຫຍ່ ຄັ້ງທີ II ຂື້ນຢ່າງເປັນທາງການ ພາຍໃຕ້ການເປັນປະທານຂອງ ທ່ານ ນາງ ສຸພາລັກ ພິລາພັນເດດ ຫົວໜ້າໜ່ວຍສະຫະພັນແມ່ຍິງພະແນກວິທະຍາສາດ ແລະເຕັກໂນໂລຊີແຂວງສາລະວັນ, ໃຫ້ກຽດເຂົ້າຮ່ວມກອງປະຊຸມໃນຄັ້ງນີ້ ປະກອບມີ ທ່ານ ສົມມະນີ ໄຊຍະວົງ ຮອງຫົວໜ້າພະແນກວິທະຍາສາດ ແລະເຕັກໂນໂລຊີແຂວງສາລະວັນ, ມີ ສະມາຊິກແມ່ຍິງພາຍໃນໜ່ວຍ, ເລຂາຊາວໜຸ່ມ, ຮອງປະທານກຳມະບານ ຂອງພະແນກວິທະຍາສາດ ແລະເຕັກໂນໂລຊີແຂວງສາລະວັນ ເຂົ້າຮ່ວມ, ພິເສດ ກອງປະຊຸມຍັງໄດ້ຮັບກຽດຟັງການໂອລົມ ແລະໃຫ້ທິດເຍືອງທາງ ຈາກທ່ານ ນາງ ດວງມາລາ ສີສະໝຸດ ຮອງປະທານສະຫະພັນແມ່ຍິງແຂວງສາລະວັນ.

ໂດຍຈຸດປະສົງຂອງກອງປະຊຸມຄັ້ງນີ້ກໍ່ເພື່ອສະຫຼຸບຕີລາຄາຄືນການຈັດຕັ້ງວຽກງານຂອງໜ່ວຍສະຫະພັນແມ່ຍິງພະແນກວິທະຍາສາດ ແລະເຕັກໂນໂລຊີແຂວງສາລະວັນ ໃນໄລຍະ 4 ປີ ຜ່ານມາ ແລະຄັດເລືອກບຸກຄະລາກອນນຳພາວຽກງານ ສະຫະພັນແມ່ຍິງຂອງພະແນກຄືນໃໝ່ ແລະຜ່ານການລົງຄະນະສຽງແບບປະຊາທິປະໄຕ ຈາກສະມາຊິກສະຫະພັນແມ່ຍິງ ພາຍໃນໜ່ວຍ ທ່ານ ນາງ ສຸພາລັກ ພິລາພັນເດດ ໄດ້ຮັບຄັດເລືອກເປັນປະທານໜ່ວຍສະຫະພັນແມ່ຍິງພະແນກວິທະຍາສາດ ແລະເຕັກໂນໂລຊີແຂວງສາລະວັນ ອີກສະໃໝ, ພ້ອມທັງເປັນຜູ່ແທນສົມບູນ ກະກຽມເຂົ້າຮ່ວມກອງປະຊຸມໃຫຍ່ຂອງ ສະຫະພັນແມ່ຍິງແຂວງສາລະວັນ ແລະທ່ານ ນາງ ຂາວພອນ ໄຊຍະເສນ ເປັນຮອງປະທານ, ເປັນຜູ່ແທນສຳຮອງ, ກອງປະຊຸມໄດ້ປິດລົງຢ່າງເປັນທາງການໃນຕອນເຊົ້າຂອງວັນດຽວກັນ.