ພະແນກວິທະຍາສາດ ແລະ ເຕັກໂນໂລຊີແຂວງສາລະວັນ ຈັດກອງປະຊຸມສະຫຼຸບຕີລາຄາການເຄື່ອນໄຫວວຽກງານປະຈຳເດືອນ 2 ປີ 2014

ໃນຕອນເຊົ້າຂອງວັນທີ 25 ກຸມພາ 2014 ພະແນກວິທະຍາສາດ ແລະ ເຕັກໂນໂລຊີແຂວງສາລະວັນ ໄດ້ເປີດກອງປະຊຸມ ເພື່ອສ່ອງແສງລາຍງານການເຄື່ອນໄຫວວຽກງານປະຈຳເດືອນ 02/2014 ແລະ ແຜນການເຄື່ອນໄຫວປະຈຳເດືອນ 03/2014 ຂຶ້ນ ຢູ່ທີ່ຫ້ອງປະຊຸມຂອງພະແນກ ໂດຍພາຍໃຕ້ການເປັນປະທານຂອງທ່ານ ສີສຸດອນ ອັງຄະໄລ, ເລຂາໜ່ວຍພັກ ຫົວໜ້າພະແນກວິທະຍາສາດ ແລະ ເຕັກໂນໂລຊີແຂວງ. ກອງປະຊຸມດັ່ງກ່າວໄດ້ມີພະນັກງານຂອງພະແນກເຂົ້າຮ່ວມທັງໆໝົດ 22 ທ່ານ, ຍິງ 08 ທ່ານ. ຈຸດປະສົງຂອງກອງປະຊຸມແມ່ນເພື່ອສະຫຼຸບ ຕີລາຄາຄືນກ່ຽວກັບວຽກງານທີ່ໄດ້ຈັດຕັ້ງປະຕິບັດ ໃນໄລຍະ 1 ເດືອນຜ່ານມາ ແລະ ວາງທິດທາງແຜນການເຄື່ອນໄຫວວຽກງານ ໃນເດືອນທີ 3/2014, ນອກຈາກນັ້ນທາງພະແນກກໍໄດ້ກ່າວເຖິງຜົນສຳເລັດໃນການການສ້າງ Website ເປັນຂອງພະແນກ ແລະ ບັນດາເມືອງສາມສ້າງຂອງແຂວງສາລະວັນ ໂດຍເຜີຍແຜ່ອອນລາຍຜ່ານລະບົບhostingຂອງລັດຖະບານ. ເຊິ່ງມີຈຳນວນ 05 ລະຫັດເຊິ່ງມີລາຍລະອຽດມີດັ່ງນີ້:
– ລະຫັດຊື່ອິນເຕີເນັດ (Domain Name) ຂອງພະແນກວິທະຍາສາດແລະເຕັກໂນໂລຊີແຂວງສາລະວັນ 127.0.0.1/Dostsaravanh ( ນຳໃຊ້ຢ່າງເປັນທາງການ ),
– ສຳລັບພາກສ່ວນທີ່ທົດລອງນຳໃຊ້ມີດັ່ງຕໍ່ໄປນີ້: ລະຫັດຊື່ອິນເຕີເນັດ (Domain Name) ຂອງເມືອງສາລະວັນ (ເມືອງສາມສ້າງ) www.muangsaravanh.gov.la,
– ລະຫັດຊື່ອິນເຕີເນັດ (Domain Name) ຂອງເມືອງຕະໂອ້ຍ (ເມືອງສາມສ້າງ) www.muangta-oy.gov.la,
– ລະຫັດຊື່ອິນເຕີເນັດ (Domain Name) ຂອງເມືອງສະໝ້ວຍ (ເມືອງພູດອຍ) www.muangsamoy.gov.la. ນອກຈາກນັ້ນ, ທາງພະແນກແມ່ນຍັງໄດ້ຮັບການຮ່ວມມືໃນການສ້າງ Website ໃຫ້ແກ່ພະແນກວິທະຍາສາດ ແລະ ເຕັກໂນໂລຊີແຂວງຈຳປາສັກ, ລະຫັດຊື່ອິນເຕີເນັດ (Domain Name): www.dostchampasak.gov.la).