ໃນຕອນເຊົ້າຂອງວັນທີ 26 ພະຈິກ 218, ທີ່ຫ້ອງປະຊຸມພະແນກວິທະຍາສາດ ແລະເຕັກໂນໂລຊີແຂວງກວາງຈິ ສສ ຫວຽດນາມ, ພະແນກວິທະຍາສາດ ແລະເຕັກໂນໂລຊີແຂວງກວາງຈິ ສສ ຫວຽດນາມ ຮ່ວມກັບ ພະແນກວິທະຍາສາດ ແລະ ເຕັກໂນໂລຊີ ແຂວງສາລະວັນ ສປປ ລາວ ຈັດກອງປະຊຸມສຳມະນາ “ທິດທາງແຜນການຮ່ວມມືດ້ານວິທະຍາສາດ ແລະເຕັກໂນໂລຊີໄລຍະ 2019-2020 ລະຫວ່າງ 2 ແຂວງກວາງຈິ ແລະສາລະວັນ” ໂດຍພາຍໃຕ້ການເປັນປະທານຮ່ວມຂອງທ່ານ ເຈີ່ນງອກເລິນ ກຳມະການພັກແຂວງ ຫົວໜ້າພະແນກວິທະຍາສາດ ແລະເຕັກໂນໂລຊີແຂວງກວາງຈິ ສສ ຫວຽດນາມ ແລະທ່ານ ແຫວນເພັດ ລັດດາວົງ ກຳມະການພັກແຂວງ ຫົວໜ້າພະແນກວິທະຍາສາດ ແລະເຕັກໂນໂລຊີແຂວງສາລະວັນ ແລະມີບັນດາພະນັກງານການນຳ, ຫົວໜ້າສູນ, ຮອງສູນ, ຫົວໜ້າຂະແໜງ, ຮອງຂະແໜງ ຈາກພະແນກວິທະຍາສາດ ແລະເຕັກໂນໂລຊີ ສອງ ແຂວງກວາງຈິ ສສ ຫວຽດນາມ ແລະແຂວງສາລະວັນ ສປປ ລາວ ເຂົ້າຮ່ວມ ລວມທັງໝົດ 28 ທ່ານ , ຍິງ 4 ທ່ານ.
ຈຸດປະສົງຂອງກອງປະຊຸມຄັ້ງນີ້, ເພື່ອເປັນການທົບທວນ ຕີລາຄາຄືນໝາກຜົນການຮ່ວມມືດ້ານວິທະຍສາດ ແລະເຕັກໂນໂລຊີ ລະຫວ່າງ 2 ພະແນກການ ແລະຮ່ວມມກັນວາງທິດທາງຮ່ວມມື ໃນໄລຍະ 2019-2020 ເຊີ່ງທັງສອງພະແນກ ຈະສືບຕໍ່ຮ່ວມມືດ້ານວິທະຍາສາດ ແລະເຕັກໂນໂລຊີ ດັ່ງນີ້:

1. ພະແນກວິທະຍາສາດ ແລະ ເຕັກໂນໂລຊີແຂວງກວາງຈິ ປະສານສົມທົບກັບ ພະແນກວິທະຍາສາດ ແລະ ເຕັກໂນໂລຊີແຂວງສາລະວັນ ຂຽນໂຄງການຮ່ວມມືສາກົນດ້ານວິທະຍາສາດ ແລະເຕັກໂນໂລຊີ ໂດຍຜ່ານການນຳຂອງສອງແຂວງ ກວາງຈິ-ສາລະວັນ ເພື່ອນຳສະເໜີຕໍ່ກະຊວງວິທະຍາສາດ ແລະເຕັກໂນໂລຊີ 2 ປະເທດ ສສ ຫວຽດນາມ ແລະສປປ ລາວ ບັນຈຸເຂົ້າໃນອະນຸສັນຍາຮ່ວມມືດ້ານວິທະຍາສາດ ແລະເຕັກໂນໂລຊີ ລະຫວ່າງ 2 ກະຊວງວິທະຍສາດ ແລະເຕັກໂນໂລຊີ ຂອງ 2 ປະເທດ ສສ ຫວຽດນາມ ແລະສປປ ລາວ ໂດຍແນ່ໃສ່ການເພີ່ມທະວີສ້າງຄວາມເຂັ້ມແຂງດ້ານວິທະຍາສາດ ແລະເຕັກໂນໂລຊີໃຫ້ແຂວງສາລະວັນ.

2. ເພື່ອໃຫ້ສູນຂໍ້ມູນຂ່າວສານຂອງເມືອງສາລະວັນ, ເມືອງສະໝ້ວຍ ແລະເວບໄຊພະແນກວິທະຍາສາດ ແລະເຕັກໂນໂລຊີແຂວງສາລະວັນ ສາມາດເຄື່ອນໄຫວໄດ້ຢ່າງມີປະສິດທິຜົນ ພະແນກວິທະຍາສາດ ແລະເຕັກໂນໂລຊີແຂວງກວາງຈິ ຈະສະໜອງຂໍ້ມູນດ້ານວິທະຍາສາດ ແລະເຕັກໂນໂລຊີ ໃຫ້ແກ່ພະແນກວິທະຍາສາດ ແລະເຕັກໂນໂລຊີແຂວງສາລະວັນ ເປັນພາສາຫວຽດ.

3. ພະແນກວິທະຍາສາດ ແລະເຕັກໂນໂລຊີແຂວງກວາງຈິ ຈະສືບຕໍ່ ຊ່ວຍເຫຼືອພະແນກວິທະຍາສາດ ແລະເຕັກໂນໂລຊີແຂວງສາລະວັນ ຝືກອົບຮົມວິຊາການ ດ້ານການກວດກາຊິງດີຈີຕອນ, ກວດກາຄຸນນະພາບນ້ຳ, ກວດກາຫົວຈ່າຍນ້ຳມັນແບບດີຈີຕໍ, ການປູກເຫັດບໍລິໂພກ ແລະເຫັດເປັນຢາ ແລະຝືກອົບຮົມຂຽນເວບໄຊດ້ວຍ HTML5&CSS3.

4. ສຳລັບການຂຽນໂປແກຣມຄຸ້ມຄອງເອກະສານຂາອອກ-ຂາເຂົ້າ ພະແນກວິທະຍາສາດ ແລະເຕັກໂນໂລຊີແຂວງຈິຈະຊ່ວຍດ້ານເຕັກນິກ, ພະແນກວິທະຍາສາດ ແລະເຕັກໂນໂລຊີແຂວງສາລະວັນ ຮັບຜິດຊອບແປໂປແກຣມເປັນພາສາລາວ.

5. ພະແນກວິທະຍາສາດ ແລະເຕັກໂນໂລຊີແຂວງກວາງຈິ ຈະຊ່ວຍສຳຫຼວດ ຂຽນແຜນ ຄວາມເປັນໄປໄດ້ໃນການສ້າງສູນສາທິດ ໃຫ້ແກ່ພະແນກວິທະຍາສາດ ແລະເຕັກໂນໂລຊີແຂວງແຂວງສາລະວັນ.

ທ້າຍວາລະກອງປະຊຸມທັງ 2 ຝ່າຍໄດ້ຮ່ວມກັນລົງນາມໃນບົດບັນທືກ MOU ແລະກອງປະຊຸມດັ່ງກ່າວນີ້ ໄດ້ປິດລົງໃນຕອນເຊົ້າຂອງວັນທີດຽວກັນ.

ຂ່າວແລະພາບ: ສັດຕະຍາ ຊົມຈັນ