ວັນທີ 9 – 10 ສິງຫາ 2018, ທ່ານ ແຫວນເພັດ ລັດດາວົງ ກໍາມະການພັກແຂວງ, ຫົວໜ້າພະແນກວິທະຍາສາດ ແລະ ເຕັກໂນໂລຊີ ແຂວງສາລະວັນ ໄດ້ເຂົ້າຮ່ວມກອງປະຊຸມສໍາມະນາ ສົ່ງເສີມການຖ່າຍທອດເຕັກໂນໂລຊີ ຫວຽດນາມ – ລາວ 2018 ແລະ ຝຶກອົບຮົມການຄຸ້ມຄອງວຽກງານວິທະຍາສາດ ແລະ ເຕັກໂນໂລຊີ ຂຶ້ນ ທີ່ສະຖາບັນການຄຸ້ມຄອງວິທະຍາສາດ ແລະ ເຕັກໂນໂລຊີ, ນະຄອນຫຼວງວຽງຈັນ ຊຶ່ງໄດ້ຮັບກຽດການເປັນປະທານຮ່ວມຂອງ ທ່ານ ບັນດິດ ສຈ. ບໍ່ວຽງຄຳ ວົງດາລາ, ກໍາມະການສູນາງພັກ, ລັດຖະມົນຕີ ກະຊວງວິທະຍາສາດ ແລະ ເຕັກໂນໂລຊີ ແລະ ທ່ານ ເຈີນ ວັນຕຸງ, ເລຂາຄະນະພັກ, ຮອງລັດຖະມົນຕີກະຊວງວິທະຍາສາດ ແລະ ເຕັກໂນໂລຊີ, ສສ ຫວຽດນາມ. ພາຍຫຼັງສໍາເລັດການກ່າວເປີດພິທີຢ່າງເປັນທາງການ, ວັນທີ 9 ສິງຫາ 2018 ກອງປະຊຸມໄດ້ຜ່ານ 2 ເອກະສານທີ່ສໍາຄັນ:
1. ບົດບາດຂອງວິທະຍາສາດ ແລະ ເຕັກໂນໂລຊີ ກັບການພັດທະນາ ເສດຖະກິດ – ສັງຄົມ.
2. ແບບວິທີການ, ທັກສະການເປັນຜູ້ນໍາ, ຄຸ້ມຄອງໃນຂະແໜງວິທະຍາສາດ ແລະ ເຕັກໂນໂລຊີ

ນອກຈາກນັ້ນ, ບັນດາທ່ານຜູ້ແທນກອງປະຊຸມກໍ່ໄດ້ເຂົ້າຮ່ວມຢ້ຽມຢາມຫ້ອງວາງສະແດງ ແລະ ແນະນໍາເຕັກໂນໂລຊີຂອງສອງປະເທດ ລາວ – ຫວຽດນາມ. ວັນທີ 10 ສິງຫາ 2018 ກອງປະຊຸມໄດ້ເຜີຍແຜ່ ເອກະສານ ການຄຸ້ມຄອງປັນຍາຊົນ ແລະ ປິດລົງໃນວັນນັ້ນ.