ໃນຕອນເຊົ້າຂອງວັນທີ 09 ພະຈິກ 2016 ພະແນກວິທະຍາສາດ ແລະ ເຕັກໂນໂລຊີແຂວງສາລະວັນ ໄດ້ຈັດກອງປະຊຸມມອບຮັບໝາກຜົນຂອງໂຄງການຮ່ວມມືລາວ-ຫວຽດ “ດ້ານວິທະຍາສາດ ແລະ ເຕັກໂນໂລຊີ ໂຄງການກວດກາຕີລາຄາສັງລວມ ເງື່ອນໄຂທໍາມະຊາດ ຊັບພະຍາກອນທໍາມະຊາດສີ່ງແວດລ້ອມ ເສດຖະກິດ-ສັງຄົມ ແລະ ສ້າງຖານຂໍ້ມູນດ້ານວິທະຍາສາດ ແລະ ເຕັກໂນໂລຊີຮັບໄຊ້ການພັດທະນາແຂວງສາລະວັນ ສ ປປ ລາວ ແບບ ຢືນຢົງ”.ກອງປະຊຸມດັ່ງກ່າວໄດ້ມີການມອບ-ຮັບໝາກຜົນກັນຢ່າງເປັນາງການ ເຊີ່ງປະກອບດ້ວຍເນື້ອໃນທີ່ສໍາຄັນຕົ້ນຕໍດັ່ງນີ້: ແຜນທີ່ທໍລະນີສາດ-ແຮ່ທາດ, ແຜນທີ່ທາດດິນປູກຝັງ, ແຜນທີ່ພູມອາກາດ, ແຜນທີ່ອຸທົກກະສາດ, ແຜນທີ່ສະພາບການນຳໃຊ້ທີ່ດິນປັດຈຸບັນ, ແຜນທີ່ຊີວະນາໆພັນ, ແຜນທີ່ສະພາບພົນລະເມືອງໃນປັດຈຸບັນ, ແຜນທີ່ສະພາບການດຳລົງຊີວິດຂອງຊົນຊາດຊົນເຜົ່າໃນປັດຈຸບັນ, ແຜນທີ່ສະພາບການຄົມມະນາຄົມໃນປັດຈຸບັນ, ສ້າງແຜນທີ່ ຕີລາຄາລະດັບຄວາມເໝາະສົມຂອງດິນ ຮັບໃຊ້ແກ່ການພັດທະນາ ກະສິກຳ-ປ່າໄມ້ທີ່ຫ້ອງປະຊຸມຂອງພະແນກວິທະຍາ ສາດ ແລະ ເຕັກໂນໂລຊີແຂວງສາລະວັນ.
ໃຫ້ກຽດເຂົ້າຮ່ວມກອງປະຊຸມຄັ້ງນີ້ປະກອບມີ: ຕາງໜ້າຄະນະນຳຂອງພະແນກວິທະຍາສາດ ແລະ ເຕັກໂນໂລຊີແຂວງສາລະວັນ ນຳໂດຍ ທ່ານ ສີສຸດອນ ອັງຄະໄຣ ຫົວໜ້າພະແນກວິທະຍາສາດ ແລະ ເຕັກໂນໂລຊີແຂວງ, ຕາງໜ້າພະແນກວິທະຍາສາດ ແລະ ເຕັກໂນໂລຊີແຂວງ ກວາງຈິ ສສ ຫວຽດນາມ ນຳໂດຍທ່ານ ເຈິ່ນ ທຽມ, ຮອງຫົວໜ້າພະແນກວິທະຍາສາດ ແລະ ເຕັກໂນໂລຊີ ແຂວງກວາງຈິ ແລະ ທິມງານຈາກສະຖາບັນຈັດສັນ ແລະ ອອກແບບກະສິກຳຮ່າໂນ້ຍ. ນອກຈາກນັ້ນຍັງມີ, ຕາງໜ້າການນໍາພະແນກການອ້ອມຂ້າງແຂວງສາລະວັນ ເຂົ້າຮ່ວມນຳເຊິ່ງປະກອບດ້ວຍ: ພະແນກແຜນການ ແລະ ການລົງທຶນແຂວງ, ພະແນກກະສິກຳ-ປ່າໄມ້ແຂວງ, ພະແນກຊັບພະຍາກອນທຳມະຊາດ ແລະ ສິ່ງແວດລ້ອມແຂວງ, ພະແນກການຕ່າງປະເທດ, ໂດຍມີຜູ້ເຂົ້າຮ່ວມທັງໝົດຈໍານວນ 24 ທ່ານ.